Në dy vjetorin e themelimit të Kanal 10, lansohen edhe dy produkte të reja, Radio 10 dhe Gazeta 10.

Në një transmetim live nga hapësirat e reja të televizionit, Drejtori i Përgjithshëm, Arben Ahmeti ka thënë se “pas një pune të mundimshme dhe me sfida por me një ekip të mrekullueshëm është bërë e mundur të përfundoj gjithë ky investim i madh”.

Ahmeti ka folur edhe për produktet e reja, Radio 10 dhe Gazeta 10 si dy risitë më të fundit të tregut medial në Kosovë.

Për punën, programacionin e ri dhe projektet e reja kanë folur edhe Drejtori i Programit, Kushtrim Sadiku dhe Drejtori i Informacionit, Xhemajl Rexha.

Lansimin simbolik të radios në transmetim e ka bërë Zëvendësdrejtori, Fidan Rama duke u shprehur besimplotë për punën e mirë që e pret këtë media të re. Gazeta 10 është prezantuar nga kryeredaktori i saj, Bashmir Xhemaj, i cili shkurtimisht ka folur për përmbajtjen e gazetës.