Reuters i është rikthyer edhe njëherë tradits së vjetër të dasmave dhe veshjeve tradicionale të grave. Rrëfimi fillon nga fshati Lubinjë e Ulët e Prizrenit, i banuar me boshnjakë. Në fokusin e agjencisë ndërkombëtare të lajmeve ishte martesa e Melsid Rexhepit me Melissa Guerrero nga SHBA-ja. 

Amerikania Melissa u mahnit kur mori pjesë në një dasmë tradicionale në vizitën e saj të parë në këtë fshat shumë vite më parë. Ajo u rikthye pas 9 vitesh për ta bërë realitet ëndrrën e saj – të martohet në mënyrën tradicionale. 

E veshur nga koka te këmbët me kostum tradicional, fytyra e saj e lyer me të bardhë me sprej të përpunuar dhe pika të kuqe, blu, ari dhe argjendi, ajo u martua me Melsidin i cili është nga një familje boshnjake në Kosovë. Reuters shkruan se boshnjaku nga Kosova ishte vetëm shtatë vjeç kur filloi lufta në Kosovë dhe familja e tij u shpërngul për në SHBA. 

Fotografitë e shkrepura nga ekipi i Reuters të grave të veshura në mënyrë tradicionale janë të mahnitshme. 

Ish-profesori i biologjisë në Prizren, Xhavit Rexhepi, thotë se të gjitha ngjyrat e linjat në fytyrën e nuses simbolizojnë lumturinë, dashurinë e respektin.