Kryeministri i Republikës së Kosovës, Albin Kurti, me rastin e festës së Pavarësisë së Malit të Zi, mirëpriti sot një delegacion nga ky vend, i përbërë nga udhëheqësi i Drejtorisë për Bashkëpunim me Diasporë-Emigrantë, Arben Jakupi, i ngarkuari me punë në Ambasadën e Malit të Zi në Kosovë, Bernard Çobaj dhe sekretarja e Ambasadës së Malit të Zi, Fedisa Daçiq.

Në takim ishte i pranishëm edhe zëvendësministri i Bujqësisë, Pylltarisë dhe Zhvillimit Rural në Qeverinë e Kosovës, Lazar Raduloviq.

Në këtë takim u bisedua për avancimin e marrëdhënieve dypalëshe, sidomos nëpërmjet rritjes së bashkëpunimit në fushën e ekonomisë, shkëmbimeve tregtare dhe energjisë, si dhe për projektet e përbashkëta infrastrukturore.

Kurti e falënderoi Malin e Zi për raportet e mira fqinjësore, për mbështetjen e vazhdueshme në rrafshin ndërkombëtar dhe për bashkëpunimin në nisma rajonale.

Kryeministri po ashtu mori pjesë në festën e organizuar nga Ambasada e Malit të Zi në Kosovë, me rastin e Ditës së Pavarësisë së Malit të Zi.