Ish-kampioni i peshave të rënda në boks, Luan Krasniqi, ka shprehur ngushëllime për vdekjen e hershme të këngëtarit nga Tetova, Shpat Kasapit.

Përmes një postimi në Facebook, Krasniqi tha se vdekja e Shpat Kasapit ua ka këputur shpirtin dhe i ka lënë të pikëlluar.

Pos tjerash, Krasniqi tha se këngëtari do të kujtohet gjithmonë për buzëqeshjen, fjalët e mira dhe shpirtin e pastër.

“Shpat i dashur, ndarja jote kaq e hershme nga kjo botë na ka këputur shpirtin dhe na ka lënë të pikëlluar thellë. Ikja jote e papritur ka krijuar një boshllëk të madh në zemrat tona, një boshllëk që askush nuk mund ta mbushë. Ne do të kujtojmë gjithmonë buzëqeshjen tënde, fjalët e tua të mira dhe shpirtin tënd të pastër që sillte dritë kudo që shkele”.

“Shkrimet tona do të mbesin gjithmonë kujtim i çmuar dhe një vlerë e veçantë për mua. Ato ruajnë çdo ndjenjë, çdo mendim dhe çdo grimë kujtimi të kohës sonë, dhe do t’i mbaj me respekt e mall të përjetshëm. Zoti e mëshiroftë dhe e nderoftë shpirtin tënd fisnik, ta pranoftë në dritën dhe mëshirën e Tij, dhe u dhëntë forcë e durim të gjithëve që po vajtojnë humbjen tënde. Prehu në paqe, Shpat. Kujtimi për ty do të jetojë gjithmonë”, ka shkruar Krasniqi.

Shpat Kasapi vdiq të mërkurën, në moshën 40-vjeçare si pasojë e një sulmi në zemër.

Ai vdiq në Itali, ku kishte shkuar bashkë me ish-bashkëshorten, Selvijen, për kurim të djalit të tyre trevjeçar.