Raporti: Blend Aliu

Tash e 22 vite, Ukshin Peci nga Mitorivica e Veriut ditën e kalon me shumë pak angazhime.

Angazhimet e tij kryesisht kanë të bëjnë me kopshtin e shtëpisë, pasi për dy dekada 57 vjecari është i papunë.

Peci që jeton për shumë vite në fshatin Zhazh, fajin ia lë shtetit i cili i sipas tij nuk e ndihmoi asnjëherë.

“Institucionet tona nuk i japin shans me ardh knej pak me na vizitu ma shumë, e kur të vijnë votat, vijnë, të parët i ki ksajde, për mi marr votat, a për me na ndihmu diçka jo, në harresë jemi ky katun prej institucioneve të Kosovës” – shprehet Mitrovicasi.

Kërkesën që të ndihmohet pjesa veriore e Mitrovicës e ka të kahmotshme, derisa thotë se gjerë më sot këto kërkesa kanë hasur në vesh të shurdhër.

Ukshin Peci ka frikë nëse situata vazhdon të jetë e tillë e pa përmirësime, ai do të detyrohet ta braktisë vendin në të cilin jetoi për gati 6 dekada.

“Ju kisha bë apel institucioneve të Kosovës të na ndihmojnë, nëse ndodh diçka në pjesën veriore na jena këtu, por me na ndihmu qe me met këtu, e jo me dal anej poshtë, se na e kemi vendin shumë të mirë, edhe jena në tokën tonë, por do me ardh puna që duhet mu largu” – ka thënë 57 vjeçari.

Ndërkaq tensionet ndër vite në Mitrovicë dhe lufta e Ukrainës sipas mitrovicasit ka bërë që banorët e fshatrave Zhazh, Boletin e Kelmend të ndjehen të frikësuar nga serbët e veriut.

Ukshin Peci tash e 57 vite jeton në fshatin Zhazh së bashku me familjen, ai thotë se nëse një ditë do të duhej ta lëshonte vendin, për këtë do t’i vinte shumë keq.