Sot shënohet 24 vjetori i rënies heroike të luftëtarit të Ushtrisë Çlirimtare të Kosovës, Bekim Berisha, i njohur me nofkën “Abeja”. Ai u vra më 10 gusht të vitit 1998, pas një luftimi disa orësh me forcat serbe, njofton Gazeta10.

Bekim Berisha në fillim të marsit të vitit 1998 me një grup shokësh mërgimtarë patin hyrë në mënyrë ilegale në Kosovë, duke u sistemuar në radhët e Ushtrisë Çlirimtare të Kosovës.

Në fillim ishte sistemuar në Açarevë të Drenicës. Ku kishte filluar organizimin dhe përgatitjet e para me ushtaret e rinjtë për mësimin e artit ushtarak.

Më 22 prill 1998 në Açarevë, Bekim Berisha, me luftëtarë të tjerë të UÇK-së ngriti flamurin shqiptar dhe hapi Akademinë Ushtarake.

Berisha, në Betejën e Junikut, më 29 maj 1998, ishte angazhuar në mbrojtje të kësaj zone, e cila kishte një rëndësi të veçantë strategjike, duke dhënë kontributin maksimal në mbrojtjen e këtij fshati që të mos bie në duar të forcave serbe të cilat e kishin rrethuar me një arsenal të madh ushtarak e njerëzor. Dhe pikërisht pas rënies së Bekim Berishës, më 10 gusht, Juniku pati rënë në duar të forcave serbe.

Për meritat dhe heroizmin e Bekim Berishës në luftë kundër regjimit serb, Shtabi i Përgjithshëm i TMK-së, pas përfundimit të luftës, e gradoi me gradën Gjeneralmajor.

Bekim Berisha në fillim u varros në Junik. Teksa, më vonë u rivarrosë në vendlindje dhe aty iu ngrit lapidari. / Gazeta10