Bashkimi Evropian ka përgatitur një listë të re mallrash amerikane me vlerë rreth 72 miliardë euro, të cilat mund të përballen me tarifa të reja nëse dështojnë bisedimet tregtare me Uashingtonin.

Sipas Reuters, ky lajm është konfirmuar nga komisioneri evropian për Tregtinë, Maros Sefcovic, gjatë një konference për shtyp të mbajtur këtë të hënë në Bruksel.

Bëhet e ditur se, sipas Sefcovis, lista tashmë është shpërndarë mes ministrave të Tregtisë të vendeve anëtare të BE-së dhe përfshin mallra amerikane që mund të goditen me taksa nëse palët nuk arrijnë një marrëveshje për shmangien e përshkallëzimit të tensioneve tregtare.

Komisioneri gjithashtu ka njoftuar se gjatë ditës do të zhvillojë bisedime me homologët e tij amerikanë për të diskutuar mbi ecurinë e negociatave.