Ambasadori i Ukrainës në Beograd ka thënë se Ukraina nuk do ta njoh Kosovën, raporton Gazeta10.

Kryeparlamentari i Serbisë, Vladimir Orliç, ka thënë se i është mirënjohës Ukrainës për qëndrimin e saj ndaj Serbisë teksa ka marrë rastin e Kosovës si shembull për shkeljen e parimit të së drejtës ndërkombëtare.

 “Ne i jemi mirënjohës vendit tuaj për respektimin e integritetit territorial dhe sovranitetit të Serbisë. Fatkeqësisht ka nga ata që vetëm me fjalë i mbrojnë parimet e së drejtës ndërkombëtare, por haptazi i shkelin ato në rastin e Kosovës-Metohisë”, tha kryeparlamentari.

Tutje, ai ka thënë se presidenti i Serbisë, Aleksandar Vuçiq, është duke e ruajtur paqen dhe stabilitetin të provokuar nga veprimet e njëanshme të Kosovës.

 “Prishtina edhe një herë po përpiqet të kërcënojë paqen me lëvizje të njëanshme dhe të rrezikshme, dhe Beogradi zyrtar, i udhëhequr nga presidenti Aleksandar Vuçiq, përsëri po përpiqet ta ruajë atë paqe për të gjithë. Përveç kësaj, Prishtina tani është në një fushatë të hapur për anëtarësim në Këshill. të Evropës, dhe në bazë të asaj se kush e mbështet, është e qartë se kush është i gatshëm të shkelë hapur sërish parimet e së drejtës ndërkombëtare”, tha Dr.Orlic, thuhet në njoftimin e Kuvendit të Serbisë, transmeton Gazeta10.

Ambasadori i Ukrainës në Serbi ka thënë se qëndrimi i Ukrainës ndaj Kosovës nuk do të ndryshojë, dhe njëkohësisht e ka falënderuar Serbinë për mbështetjen që ia ka dhënë duke përmendur refugjatët.

“Ambasadori Tolkach konfirmoi se qëndrimi i Ukrainës për Kosovë-Metohi nuk do të ndryshojë dhe falënderoi Serbinë për mbështetjen në kohë të vështira dhe kujdesin ndaj refugjatëve. “Dy vendet tona kanë detyrën e vështirë për të mbrojtur parimet e së drejtës ndërkombëtare. Ne jemi të vetëdijshëm se situata në Kosovë-Metohi nuk është e lehtë dhe ne do të vazhdojmë të mbështesim fuqimisht integritetin territorial dhe sovranitetin e vendit tuaj. Këto parime duhet të zbatohen në mënyrë të barabartë për të gjithëve dhe siç theksojnë zyrtarët serbë, kur e mbrojmë integritetin tonë, e mbrojmë edhe për të tjerët”, tha Tolkach.

Kujtojmë se Serbia është shteti i vetëm në Europë që nuk iu është bashkuar sanksioneve të Perëndimit ndaj Rusisë pas fillimit të luftës në Ukrainë, ndërsa Kosova ka vendosur sanksione dhe po ashtu ka dhënë ndihmë financiare Ukrainës.  / Gazeta10