Shoqata e Industrisë së Qumështit të Kosovës, e cila, përfaqëson kompanitë Aldi, Bylmeti, Drena, Golaj SHPK, Bio Sharri Progress, Kabi, Magic Ice, Qaushi, Rugove, Sharri Prizren, Abi, Vita, Jeti, Koral dhe Sharri Kuk, ka shprehur shqetësimin e saj, lidhur me mënyrën se si ministria e Bujqësisë, dhe, AUV, i kanë prezantuar rezultatet e kontrolleve në sektorin e qumështit.

Nga SHIQK, thuhet edhe se ata e mbështesin plotësisht kontrollin institucional, sigurinë ushqimore dhe marrjen e masave ndaj çdo operatori që ka shkelur ligjin, porse, shtohet nga shoqata, asnjë kompani dhe asnjë sektor nuk mund të dënohet publikisht pa u publikuar analizat origjinale, dokumentacioni përkatës dhe provat e verifikueshme.

‘‘Në konferencë u deklarua se janë marrë 495 mostra, janë analizuar 471 prej tyre dhe janë identifikuar 93 mospërputhje. Por publikut nuk iu prezantuan raportet e plota laboratorike, etiketat origjinale të produkteve, numrat e loteve, datat e mostrimit, procesverbalet dhe metodat laboratorike të përdorura’’, thuhet mes tjerash në reagim.

Nga shoqata, është kërkuar; Emri i produktit, prodhuesin ose importuesin dhe numrin e lotit; Fotografia dhe kopja e etiketës origjinale; Data, vendi dhe procesverbali i marrjes së mostrës; Metodën laboratorike dhe statusin e akreditimit; Lista e plotë të 93 mospërputhjeve; Sqarimi për dallimin ndërmjet 495 mostrave të marra dhe 471 të analizuara.

Ndryshe, anëtarët e lartpërmendur të kësaj shoqate, grumbullojnë së bashku mbi 300,000 litra qumësht në ditë, duke përfaqësuar pjesën dërrmuese të përpunimit të qumështit vendor dhe mijëra fermerë në mbarë Kosovën.

‘‘Njëkohësisht, vërejmë se në diskutimet publike dhe institucionale është përfshirë edhe organizata e quajtur “Shoqata e Qumështorëve të Kosovës”, e cila, sipas informacioneve që disponojmë, përfaqësohet nga kompania Ajka përmes z. Ramadan Mema. Sipas të dhënave tona, kjo kompani grumbullon rreth 1,000 litra qumësht në ditë dhe për këtë arsye, vlerësojmë se kjo organizatë nuk mund të konsiderohet përfaqësuese e industrisë së qumështit në Kosovë. U bëjmë thirrje institucioneve që në proceset e konsultimit dhe vendimmarrjes të mbështeten te organizatat që përfaqësojnë realisht sektorin, mbi bazën e anëtarësisë, kapacitetit prodhues dhe peshës së tyre në treg, duke siguruar transparencë dhe trajtim të barabartë për të gjithë operatorët’’, thuhet nga Shoqata mes tjerash.

Komunikata:

PUBLIKONI PROVAT, JO VETËM PREZANTIMET!

Shoqata e Industrisë së Qumështit të Kosovës shpreh shqetësimin e saj të thellë lidhur me mënyrën se si Ministria e Bujqësisë dhe Agjencia e Ushqimit dhe Veterinarisë i kanë prezantuar rezultatet e kontrolleve në sektorin e qumështit.

Ne e mbështesim plotësisht kontrollin institucional, sigurinë ushqimore dhe marrjen e masave ndaj çdo operatori që ka shkelur ligjin. Megjithatë, asnjë kompani dhe asnjë sektor nuk mund të dënohet publikisht pa u publikuar analizat origjinale, dokumentacioni përkatës dhe provat e verifikueshme.

Në konferencë u deklarua se janë marrë 495 mostra, janë analizuar 471 prej tyre dhe janë identifikuar 93 mospërputhje. Por publikut nuk iu prezantuan raportet e plota laboratorike, etiketat origjinale të produkteve, numrat e loteve, datat e mostrimit, procesverbalet dhe metodat laboratorike të përdorura.

Një tabelë apo prezantim publik nuk mund ta zëvendësojë raportin origjinal laboratorik. Pa dokumentacion të plotë, publiku nuk mund ta kuptojë se cili produkt konkret është analizuar dhe mbi çfarë prove është ngritur akuza.

Gjithashtu, duhet të bëhet dallim i qartë ndërmjet një produkti të pasigurt për konsum, një mospërputhjeje në etiketim, një çështjeje autorizimi dhe pretendimit për përdorimin e një përbërësi të padeklaruar. Këto janë kategori të ndryshme teknike dhe juridike dhe nuk mund të paraqiten të gjitha si rrezik për shëndetin publik.

PRANDAJ, KËRKOJMË QË MINISTRIA DHE AUV-I TË PUBLIKOJNË MENJËHERË:

 Raportin e plotë laboratorik për secilën mostër të kontestuar;

 Emrin e produktit, prodhuesin ose importuesin dhe numrin e lotit;

 Fotografinë dhe kopjen e etiketës origjinale;

 Datën, vendin dhe procesverbalin e marrjes së mostrës;

 Metodën laboratorike dhe statusin e akreditimit;

 Listën e plotë të 93 mospërputhjeve;

 Sqarimin për dallimin ndërmjet 495 mostrave të marra dhe 471 të analizuara;

 Ndarjen ndërmjet produkteve vendore, produkteve të importuara dhe preparateve me yndyrë bimore.

Shoqata nuk mbron asnjë shkelje. Kushdo që ka mashtruar konsumatorin duhet të përgjigjet para ligjit. Por kundërshtojmë dënimin publik pa prova dhe krijimin e një atmosfere ku i gjithë prodhimi vendor paraqitet si i dyshimtë.

Pasojat nuk i bart vetëm një kompani. Ato i bartin fermerët, punëtorët, furnitorët vendorë dhe kompanitë që kanë investuar miliona euro. Dëmtimi i besimit te prodhimi vendor i hap edhe më shumë hapësirë produkteve të importuara.

NE, SI QUMËSHTORE, DEKLAROJMË SE NËSE REZULTATET E PLOTA TË ANALIZAVE DHE DOKUMENTACIONI PËRKATËS NUK PUBLIKOHEN DERI MË 12 GUSHT 2026, DO TË DETYROHEMI TA NDALIM GRUMBULLIMIN E QUMËSHTIT.