Familjarët e Sherif Hotit, 38-vjeçarit që humbi jetën mbrëmë në aksidentin tragjik në autostradën “Ibrahim Rugova”, kanë reaguar përmes një postimi në Facebook, duke shprehur dhimbjen e madhe për humbjen e tij të hershme.

Ata kanë bërë të ditur se i ndjeri do të varroset sot.

“Na i coptove zemrat more djal, shume shpejt shkove. Nuk po arrije ende me besu qe ai aksident trafiku do ishte beteja jote e fundit me jeten”, shkroi mes tjerash një familjar në Facebook.

Sherif Hoti, nga Bradashi i Podujevës, humbi jetën mbrëmë në një aksident në kilometrin e 29-të të autostradës “Ibrahim Rugova”, në drejtimin Gjergjicë–Vërmicë, ku u përplas kamioni që drejtonte me një veturë Audi A6.

Vdekja e tij u konstatua në vendin e ngjarjes nga mjeku i QMF-së në Suharekë, ndërsa trupi i pajetë u dërgua në Institutin e Mjekësisë Ligjore për obduksion, me urdhër të Prokurorisë.

Nga aksidenti mbetën të lënduar edhe dy persona që ndodheshin në Audi, të cilët u transportuan për trajtim mjekësor dhe, sipas informacioneve fillestare, janë jashtë rrezikut për jetë.