Pas votimit të Qeverisë së re, Albin Kurti falënderoi deputetët që mbështetën ekzekutivin e ri, duke u zotuar për realizimin e programit qeverisës.

“Ju falënderoj të gjithë deputetët që votuan për Qeverinë. Shpreh mirënjohjen time, por njëkohësisht edhe zotimin tonë për të mbështetur qytetarët pa dallim dhe për të realizuar me përpikëri të gjitha zotimet tona”, tha Kurti.

Pas kësaj, anëtarët e Qeverisë së re bënë betimin.

“Betohem se do ta kryej me përkushtim e nder detyrën e anëtarit të Qeverisë, do ta respektoj Kushtetutën, ligjet dhe rendin juridik dhe do të angazhohem për përparimin e përgjithshëm të Republikës së Kosovës. Betohem”, thuhet në betimin e Qeverisë./Gazeta10