Policia e Kosovës është deklaruar në lidhje me zhvillimet aktuale në veri të vendit.

Nga Policia është thënë se referuar zhvillimeve aktuale sot ka pasur paraqitje të dorëheqjeve të punonjësve policor të komuniteti serb në pjesën veriore të vendit, saktësisht në zonën e drejtorisë së Mitrovicës së Veriut.

Tutje është theksuar se njoftimet e tyre për dorëheqje janë bërë në rajonet dhe stacionet policore, ku disa prej tyre deri më tani i kanë doëzuar edhe pajisjet e tyre, për të vazhduar me kompletimin e procedurave tjera të parapara.

“Policia e Kosovës ka kapacitete për menaxhimin e situatës dhe rrethanave të krijuara, të gjitha veprimet do ti ndërmerr konform autorizimeve ligjore dhe kushtetuese, konform vlerësimeve dhe planifikimeve operacionale, me qëllim të ruajtjes së rendit e qetësisë publike si dhe mbikëqyrjes dhe kontrollit kufitar”,u tha tutje nga Policia e Kosovës.

Duhet përkujtuar që një numër i madh i serbëve kanë dorëzuar dorëheqjet e tyre nga Policia e Kosovës.

Sipas raportimeve të deritanishme bëhet fjalë për mbi 300 zyrtarë policorë, ndërsa për nesër është paralajmëruar edhe dorëheqja e 150 zyrtarëve të tjerë policorë nga komuniteti serb.

Pak më parë policët serbë theksohet të jenë larguar edhe nga pikat kufitare në Jarinje dhe Bërnjak.