Papa Leo XIV ka paralajmëruar për rreziqet e inteligjencës artificiale gjatë nisjes së vizitës së tij katërditore në Francë, duke bërë thirrje që njerëzimi të mos “humbasë mes një parajse makinash”.

Pas takimit me presidentin francez Emmanuel Macron në Pallatin Élysée, Papa tha se AI paraqet sfida për njerëzimin.

Vizita do të kulmojë të shtunën me një meshë në Paris, ku pritet të marrin pjesë mbi 500 mijë persona.

Papa u prit në aeroportin Orly nga Macron dhe më vonë do të udhëtojë me papamobil drejt Notre-Dame, ndërsa në mbrëmje do të takohet me rreth 80 mijë të rinj në Stade de France.

Të dielën do të udhëtojë në Lourdes, ku rreth 150 mijë persona pritet të marrin pjesë në meshë, ndërsa të hënën do të vizitojë Metz-in.

Në Francë, Papa do të takohet edhe me migrantë dhe me viktima të abuzimit seksual nga klerikë katolikë.

Macron nuk do të marrë pjesë në meshën e Papës për shkak të ndarjes së rreptë të shtetit dhe fesë në Francë, raporton BBC.

Papa Leo XIV, i lindur në Çikago më 1955 si Robert Prevost, ka prejardhje franceze nga ana e gjyshes së tij atërore.

Franca sot është një vend i sekularizuar, ku më pak se gjysma e popullsisë identifikohet si katolike dhe më pak se 5% ndjekin rregullisht meshën.

Megjithatë, numri i pagëzimeve të të rriturve është më shumë se dyfishuar në pesë vjet, duke arritur në 10 mijë në vitin 2025.

“Franca është sekularizuar, por aty ku dikur ishin Zoti dhe vlerat, tani ka një boshllëk. Njerëzit po kërkojnë diçka”, tha kardinali François Bustillo.