Ministri i jashtëm për një kohë të gjatë i Bjellorusisë ka vdekur papritur, njoftoi agjencia shtetërore e lajmeve Belta të shtunën, dy ditë përpara se ai të duhej të takonte homologun e tij rus, shkruan Reuters, transmeton Gazeta10.

“Ministri i Jashtëm Vladimir Makei ka ndërruar jetë papritur”, raportoi Belta pa dhënë detaje të mëtejshme. Makei e mbante postin e tij që nga viti 2012.

Makei, 64 vjeç, mori pjesë në një konferencë të Organizatës së Traktatit të Sigurisë Kolektive (CSTO) – një aleancë ushtarake e disa shteteve post-sovjetike – në Jerevan në fillim të kësaj jave dhe do të takonte homologun e tij rus Sergei Lavrov të hënën.

Para zgjedhjeve presidenciale dhe protestave masive antiqeveritare në Bjellorusi në vitin 2020, Makei kishte qenë një nga nismëtarët e përpjekjeve për të përmirësuar marrëdhëniet e Bjellorusisë me Perëndimin dhe kishte kritikuar Rusinë.

Megjithatë, ai ndryshoi papritmas qëndrimin e tij pas fillimit të protestave, duke thënë se ato ishin frymëzuar nga agjentë të Perëndimit.

Pasi pushtimi rus i Ukrainës filloi në shkurt, Makei, një mbështetës i lidhjeve të ngushta midis Moskës dhe Minskut, tha se Perëndimi kishte provokuar luftën dhe se autoritetet ukrainase duhet të pajtohen me kushtet ruse të paqes.

Pak ditë para fillimit të luftës, Makei premtoi se nuk do të kishte asnjë sulm ndaj Ukrainës nga territori i Bjellorusisë. Disa ditë më vonë, trupat ruse vërtetuan se ai kishte gabuar.

“Jemi të tronditur nga raportet për vdekjen e kreut të Ministrisë së Punëve të Jashtme të Republikës së Bjellorusisë, Vladimir Makei”, postoi zëdhënësja e Ministrisë së Jashtme ruse Maria Zakharova në kanalin e saj Telegram. “Ngushëllimet zyrtare do të publikohen së shpejti”.

Presidenti i Bjellorusisë, Aleksandër Lukashenko, i cili ruajti pushtetin pavarësisht protestave të vitit 2020, shprehu gjithashtu ngushëllimet e tij.

Liderja e opozitës në mërgim, Sviatlana Tsikhanouskaya, duke komentuar vdekjen e ministrit e quajti Makei-n tradhtar të popullit bjellorus.

“Në vitin 2020, Makei tradhtoi popullin bjellorus dhe mbështeti tiraninë. Kështu do ta kujtojë populli bjellorus”, tha Tsikhanouskaya. / Gazeta10