Prokuroria Speciale ka bërë kërkesë për caktim të paraburgimit ndaj një të ndaluari për krime lufte, raporton Gazeta10.

Në njoftim thuhet se personi me inicialet S.T është ndaluar për veprën penale Krimet e luftës kundër popullatës civile.

Më tej, thuhet se veprimet e të pandehurit në fjalë janë në kundërshtim me konventat e Gjenevës dhe ligjeve ndërkombëtare në kohën e konfliktit të armatosur në Kosovë.

Tutje, thuhet se Prokuroria ka dyshime se i njejti ka qenë i përfshirë në ofenzivën ushtarake të datës 06.04.1999 në fshatin Reznik të Vushtrrisë.

Këtu keni njofimin e plotë:

PROKURORIA SPECIALE KA BËRË KËRKESË PËR CAKTIM TË PARABURGIMIT KUNDËR PERSONIT S.T. I NDALUAR PËR KRIME LUFTE Prishtinë, 16 dhjetor 2022 –

“Me urdhër të Prokurorisë Speciale të Republikës së Kosovës, Policia e Kosovës ka ndaluar një person me inicialet S.T. për veprën penale Krimet e luftës kundër popullatës civile, e paraparë dhe e dënueshme sipas nenit 142 dhe 22 të Kodit Penal të RSFJ, aktualisht e penalizuar edhe me nenet 31 dhe 153 të KPRK. Veprimet e të pandehurit S.T. janë në kundërshtim me konventat e Gjenevës, dhe ligjet ndërkombëtare në fuqi në kohën e konfliktit të armatosur në Kosovë. Dyshimet e Prokurorisë Speciale konsistojnë në faktin se i pandehuri S.T. së bashku edhe me persona të tjerë të uniformuar ka marr pjesë në në ofensivën ushtarake të datës 06.04.1999, në fshatin Reznik, Komuna e Vushtrrisë dhe në ofensivën e datës 02.05.1999, në qytetin e Vushtrrisë. Në këtë rast i pandehuri në bashkëveprim edhe me persona të tjerë ka qenë i përfshirë në keqtrajtimin, maltretimin, plaçkitjen si dhe vrasjen e personave civil dhe shpërnguljen më dhunë nga shtëpitë e tyre gjatë kohës se luftës. Si pasojë e këtyre veprimeve inkriminuese të të pandehurit, Prokuroria Speciale me qëllim të sigurimit të prezencës të të njëjtit në procedurë, ka bërë kërkesë në Gjykatën Themelore në Prishtinë – Departamenti Speciale, për caktimin e masës së paraburgimit ndaj të njëjtit”, thuhet në njoftimin e tyre. / Gazeta10