Ministri i Punëve të Jashtme të Serbisë, Ivica Daçiq, deklaroi se që nga fillimi i luftës në Ukrainë, nga Serbia nuk është eksportuar armë në asnjërën palë.

“Serbia dhe unë, për shkak se Ministria ime jep leje për eksport, nuk eksporton pajisje ushtarake në asnjë vend që ne besojmë se do të ishte problematik dhe i diskutueshëm”, ka thënë ai, transmeton N1 .

Ai theksoi se bëhet fjalë për institucione legale që mund të eksportojnë armë. Paraprakisht, Moska i kërkoi Beogradit një qëndrim zyrtar lidhur me informacionin se armët serbe i janë dorëzuar Ukrainës, të cilin e ka bërë të ditur zëdhënësja e Ministrisë së Punëve të Jashtme të Rusisë, Maria Zakharova.

Në mediat ruse dhe në kanalet Telegram u shfaqën pretendime se Serbia në mënyrë të fshehtë dërgoi 3500 raketa për sistemet raketore Grad në Ukrainë nëpërmjet Turqisë dhe Sllovakisë.

Kompania Krusik njoftoi këtë javë se nuk është e lidhur me shitjen e raketave te përdoruesi përfundimtar, Ukraina. Akuzat se Serbia eksporton armë në Ukrainë ishin mohuar më parë nga ministri i Mbrojtjes, Millosh Vuçeviq.