Policia e Kosovës ka arrestuar një shtetas të Shqipërisë, pasi gjatë kontrollit në pikën kufitare në Vërmicë është gjetur një sasi prej rreth 2.162 kilogramë marihuanë.

Rasti ka ndodhur më 8 shtator, gjatë realizimit të planit taktik “Transporti”, ku njësitë policore të Stacionit Policor Kufitar në Vërmicë, në bashkëpunim me zyrtarët doganorë, kanë përzgjedhur automjete dhe persona për kontroll të vijës së dytë.

Në mesin e automjeteve të ndaluara për kontroll ka qenë edhe një autobus që po hynte në Kosovë nga Shqipëria.

Gjatë kontrollit të autobusit dhe bagazheve personale të udhëtarëve, në çantën e krahut të të dyshuarit është gjetur një qese me lëndë narkotike të llojit marihuanë, me peshë rreth 2.162 kilogramë.

Njësitë përkatëse policore kanë dalë në vendngjarje dhe kanë administruar provat materiale. Për rastin është njoftuar prokurori kompetent, i cili ka iniciuar rast për veprën penale “blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”.

Me vendim të prokurorit, të dyshuarit i është caktuar masa e ndalimit prej 48 orësh.