Një muaj pas disa tërmeteve që u ndjenë në Kosovë, banorët e lagjes Bair në Mitrovicë po përballen me pasoja të rënda në terren dhe në banesat e tyre. Arsim Nuli, banor i kësaj zone, në një deklaratë për emisionin “Gazeta” në Kanal10, ka ngritur shqetësimet për gjendjen e rënduar dhe mungesën e reagimit institucional.

Sipas tij, tërmeti nuk ka ndodhur në Mitrovicë, por në malet e Sharrit, megjithatë ka ndikuar drejtpërdrejt në zonën ku jetojnë.

“Tërmeti ka ndodh në malet e Sharrit, jo në Mitrovicë, e këtu është dukuri e shpatit i cili është aktivizu prej vitit 2023. Tërmeti që ndodhi atje e aktivizoi në pjesën tonë. Ka shumë faktorë që kanë ndiku në këtë proces, por mbi të gjitha ne po mendojmë që pjesa argjilë e ka humb stabilitetin,” tha Nuli.

Ai shtoi se dëmet janë përkeqësuar ndjeshëm pas reshjeve të janarit dhe lëkundjeve sizmike, duke bërë që shumë shtëpi të dëmtohen rëndë.

“Shtëpitë të cilat ishin të rrënuara prej vitit 2023 pothuajse janë shkatërru dhe rrafshu, ndërsa disa tjera janë plasarit dhe janë të rrezikuara me çarje. Pas reshjeve në janar dhe pas tërmetit kishte zgjerim të problemit,” theksoi ai.

Banorët, sipas tij, janë mobilizuar menjëherë pas tërmetit dhe kanë kërkuar ndihmë nga institucionet përkatëse.

“Pas tërmetit kemi dalë, jemi mbledh dhe kemi pa që vijat e plasaritjeve ishin aktivizu. Kemi intervenu me ndihmë nga policia dhe drejtoria komunale e emergjencës që kanë dalë në teren,” u shpreh Nuli.

Megjithatë, ai kritikon mungesën e veprimeve konkrete nga institucionet, pavarësisht kërkesave të vazhdueshme.

“Në të gjitha institucionet kemi kërku ndihmë dhe nuk kemi marrë përgjigje deri tash. Është fol që janë formu komisione, por në lagjen tonë akoma nuk po shohim diçka konkrete,” deklaroi ai.

Një nga problemet kryesore mbetet infrastruktura e dëmtuar, përfshirë kanalizimin dhe një përrua në fund të lagjes.

“Nuk u rregullu kanalizimi i lagjes që u prish, prroi në fund të lagjes që u dëmtu nga qeverisja lokale me qëllim të përmirësimit, por nuk u përmirësu më,” përfundoi Nuli.