Në Tetovë është vënë sot gurëthemeli i një fabrike të re për prodhimin e veturave elektrike e.GO, investim i familjes së Lazim Destani. Filantropi dhe biznesmeni i njohur shqiptar është shprehur i emocionuar me këtë invesim të madh të familjes së tij.

“Si sot para 50 viteve mora rrugën e mërgimit për në Gjermani dhe sot jam shumë i lumtur që po sjelli një investim nga Gjermania këtu“, ka thënë ai me plotë emocione. 

“Fakti që më gëzon shumë është që në këtë fabrikë do të punësohen shumë të ri dhe të reja. Ajo që vlen të theksohet është që afaristët nga diaspora janë më se të obliguar që të investojnë në vendin e tyre për të mbajtur rininë në vendin tonë. Sot është një ditë historike për mua sepse në Tetovë po sjellim makinat e së ardhmes dhe këtë ia kam kërkuar gjithmonë bordit të kompanisë, që kompania jonë të mos shohë konkurrencë por të shohim risi drejt së ardhmes le ta shijojmë së bashku futjen e Maqedonisë së Veriut në hartën e vendeve për prodhimin e makinave të avancuara teknologjike elektrike“, ka thënë Lazim Destani.

I pranishëm kryetari i BDI-së, Ali Ahmeti ka thënë se “ky projekt ka mbështetjen edhe të qeverisë së Maqedonisë së Veriut me 130 milionë euro”.  Në këtë fabrikë pritet të punësohen 900 veta.