Dy personat që dyshohet se janë përfshirë në sulmin ndaj kapitenit të Policisë së Kosovës, Besart Ahmeti, në zonën e Prishtina Mall, janë djemtë e një zyrtari policor.

Burimet e Sinjalit bëjnë të ditur se incidenti ka ndodhur pas një mosmarrëveshjeje që dyshohet se nisi për çështje parkingu, e cila më pas eskaloi në konfrontim.

Sipas informacioneve në përleshje janë përfshirë dy persona, të cilët dyshohet se kanë sulmuar kapitenin Ahmeti.

Mësohet se të dy të dyshuarit janë vëllezër dhe djemtë e një zyrtari të Policisë së Kosovës.

Pas incidentit, në rast janë përfshirë zyrtarët policorë nga Stacioni Policor në Graçanicë, ndërsa më pas është angazhuar edhe Njësia për Reagim të Shpejtë (NJRSh).

Të gjitha palët e përfshira janë shoqëruar në Stacionin Policor në Graçanicë, ku kanë nisur veprimet për sqarimin e plotë të rrethanave të incidentit.

Për rastin është përfshirë edhe Inspektorati Policor i Kosovës, ndërsa pritet që hetimet të përcaktojnë dinamikën e plotë të ngjarjes dhe përgjegjësinë eventuale të secilit prej personave të përfshirë.