Policia e Kosovës ka njoftuar se ka shkuar në 8 numri i personave të arrestuar si të dyshuar për sulmin ndaj Policisë së Kosovës në Banjskë të Zveçanit, ku mbeti i vrarë polici Afrim Bunjaku, si dhe u plagosën dy policë të tjerë.

Në detajet e fundit që ka dhënë policia, u bë e ditur se në manastir ndër tjera është gjetur edhe një helmet e Policisë së Kosovës e cila është marrë nga vendi i ngjarjes ku është vrarë rreshteri Afrim Bunjaku. Poashtu, aty janë gjetur edhe dy armë të gjata AK 47.

Policia ka deklaruar se njësitet policore në rrethanat e krijuara në zonën e fshatit Banjskë, po qëndrojnë afër qytetarëve, duke iu ofruar siguri dhe duke iu mundësuar e ofruar ndihmë sipas nevojave dhe kërkesave të banorëve.

Policia ka njoftuar se mjetet e konfiskuara dje përbëjnë një veturë rëndë të blinduar, dy vetura dhe një makineri e rëndë (bager), të cilat kanë qenë të mbushura me sasi të madhe të armëve të ndryshme.