Disa organizata mediatike në Irlandë u evakuuan të premten, pasi pranuan një email me kërcënim për bombë. Në mesin e tyre ishte edhe transmetuesi publik kombëtar i Irlandës, RTÉ.

Alarmi u ngrit të premten në mëngjes, pasi RTÉ dhe disa organizata të tjera mediatike në Irlandë dhe Britani pranuan mesazhin kërcënues, njoftoi transmetuesi publik.

Qeveria irlandeze ka paralajmëruar për një “fushatë të mundshme të koordinuar për të shkaktuar kaos”, në një deklaratë ku iu përgjigj kërcënimeve të fundit me bomba ndaj fluturimeve në Europë, pas kërcënimeve të ngjashme të bëra ndaj disa organizatave mediatike në Irlandë.

Në një deklaratë, qeveria irlandeze tha:

“Kërcënimet e bëra këtë mëngjes ndaj organizatave mediatike në vendin tonë janë shumë serioze.

Kërcënimet e rreme të këtij lloji shkaktojnë frikë, shqetësim dhe pengesa për njerëzit që vazhdojnë jetën dhe aktivitetet e tyre të përditshme. Ato nuk sjellin absolutisht asnjë përfitim. Ende nuk dihet se kush qëndron prapa këtyre kërcënimeve, nëse bëhet fjalë për individë apo për një përpjekje të centralizuar ose të koordinuar.

Megjithatë, këto kërcënime vijnë pas ndërprerjeve të vazhdueshme të trafikut ajror në Europë, të shkaktuara nga kërcënime të ngjashme, dhe duket se, me gjasë, kemi të bëjmë me një fushatë të koordinuar për të shkaktuar kaos.”

Më tej, në deklaratë thuhet:

“Policia irlandeze (Garda), në bashkëpunim me Forcat e Mbrojtjes, si dhe autoritetet tona të sigurisë kibernetike dhe të aviacionit, po punojnë për të përcaktuar se kush është përgjegjës. Garda dhe Forcat e Mbrojtjes janë në kontakt të vazhdueshëm me homologët e tyre europianë në fushën e sigurisë. Do të bëhen të gjitha përpjekjet për të identifikuar përgjegjësit dhe për t’i vënë ata para drejtësisë.

Megjithatë, përparësia kryesore është garantimi i sigurisë së njerëzve, pavarësisht pengesave të pashmangshme dhe të padëshiruara që mund të shkaktohen.

Garda ka qenë e vetëdijshme për rrezikun e kërcënimeve të tilla që mund të shkaktojnë ndërprerje, në kuadër të planifikimit të aktiviteteve për Presidencën e BE-së, dhe po zbaton protokollet përkatëse në përgjigje të tyre.”