Një person ka vdekur dhe pesë janë plagosur si pasojë e disa të shtënave me armë zjarri në lagjen Aktash të Prishtinës të dielën e 1 shtatorit.

Në këtë përleshje kanë qenë të përfshirë familja Sekiraqa dhe familja Gashi të njohur si Capat.

Prokuroria Themelore në Prishtinë ka njoftuar dje se janë ndaluar pesë persona për 48 orë si dhe konflikti ka ndodh për mosmarrëveshje të mëhershme.

Kurse sot në ora 14:00 do të mbahet seanca e parë dëgjimore për pesë të dyshuarit. Kjo është konfirmuar për lajmi.net nga zëdhënësja e Gjykatës Themelore në Prishtinë, Mirlinda Gashi.

Gashi ka njoftuar po ashtu se tashmë kanë pranuar kërkesën e Prokurorisë për caktimin e masës së paraburgimit ndaj pesë të dyshuarve.

Prokuroria Themelore ka kërkuar që të dyshuarve t’u caktohet masa e paraburgimit prej 30 ditëve. Seanca e parë dëgjimore në këtë rast do të zhvillohet në një ambient krejt tjetër, në atë të Qendrës Klinike Universitare të Kosovës.

Për shkak se të përfshirët në këtë rast: Salih Sekiraqa, Korab Gashi, Robert Llumnica, Fatos Abazi si dhe Valdrin Ademi vazhdojnë të jenë duke u trajtuar në kuadër të klinikave në QKUK.

“Seanca dëgjimore do të mbahet sot në ora 14:00. Kërkesa për paraburgim për 30 ditë ndaj pesë të dyshuarve është pranuar sot nga Prokuroria Themelore në Prishtinë në Gjykatën Themelore dhe ajo do të trajtohet në seancë”, ka thënë Mirlinda Gashi.

Ndryshe ky rast u cilësua si “Vrasje në bashkëkryerje”, ku theksohej se ishin shtënë 100 plumba radhazi nga armë të ndryshme.