Kryeministri në detyrë i Republikës së Kosovës, Albin Kurti, ka pranuar një letër nga kongresisti republikan i Shteteve të Bashkuara të Amerikës, Michael V. Lawler, në të cilën theksohet mbështetja e vazhdueshme dhe dypartiake e Kongresit amerikan për Kosovën.

Në letër, kongresisti Lawler e ka falënderuar kryeministrin Kurti për takimin që zhvilluan në New York në fund të muajit shtator, gjatë vizitës së tij në Shtetet e Bashkuara të Amerikës. Ai ka vlerësuar progresin e Kosovës në forcimin e institucioneve demokratike, rritjen e transparencës dhe llogaridhënies, si dhe nxitjen e zhvillimit ekonomik.

Lawler ka theksuar se veprimet e fundit legjislative në Kongresi i Shteteve të Bashkuara, përfshirë miratimin e Ligjit për Autorizimin e Mbrojtjes Kombëtare për vitin fiskal 2026, dëshmojnë përkushtimin e vazhdueshëm të Amerikës ndaj së ardhmes euro-atlantike të Republika e Kosovës. Sipas tij, këto përpjekje janë thelbësore për promovimin e stabilitetit afatgjatë, sigurisë dhe sundimit të ligjit në mbarë Ballkanin Perëndimor.

Në përfundim të letrës, kongresisti amerikan i ka shprehur urimet e tij më të mira kryeministrit Kurti dhe familjes së tij me rastin e sezonit festiv, duke shprehur gatishmërinë për të vazhduar bashkëpunimin e ngushtë dhe angazhimin konstruktiv edhe gjatë vitit të ardhshëm.