Qeveria e Kosovës sapo ka njoftuar se ka shtyrë vendimin për vendosjen e reciprocitetit me Serbinë për një muaj, shkruan Gazeta10.

Në njoftimin e Qeverisë së Kosovës është thënë se ky vendim është marrë pasi krerët e shtetit kanë zhvilluar takime me partnerët ndërkombëtarë të Kosovës.

Po ashtu, në njoftim është dënuar ashpër bllokimi i rrugëve në veri të Kosovës nga njerëz të armatosur të strukturave ilegale atje.

Në fund, Qeveria e Kosovës ka falënderuar partnërt ndërkombëtarë dhe specifikisht ambasadorin amerikan, Jeffrey Hovenier për angazhimin e tyre në këto rrethana.

Këtu keni njoftimin e plotë:

“Qeveria e Republikës së Kosovës dënon bllokimin e rrugëve dhe të shtënat në veri të Kosovës

Prishtinë, 31 korrik 2022

Qeveria e Republikës së Kosovës dënon ashpër bllokimin e sotëm të rrugëve në veri të Kosovës dhe të shtënat nga njerëz të armatosur të strukturave ilegale atje. Bëhet fjalë për tendencë për destabilizimin e Kosovës dhe rrezikimin e paqes dhe sigurisë së qytetarëve dhe vendit tonë. Akte agresive të shumta ka pasur në pasditen dhe mbrëmjen e sontme të nxitura e të përgatitura nga Beogradi zyrtar.

Kryeministri Kurti së bashku me Presidenten Osmani dhe zëvendës kryeministrat Bislimi e Gërvalla kanë zhvilluar kontakte e takime me faktorët ndërkombëtarë amerikanë dhe evropianë. Me këtë rast, Qeveria e Kosovës jep zotimin që të shtyhet zbatimi i dy vendimeve të datës 29 qershor 2022, deri me datën 1 shtator 2022, nga momenti në ditën e hënë, 1 gusht 2022, kur do të hiqen të gjitha barrikadat dhe të vendoset liria e plotë e lëvizjes në të gjitha rrugët në veri të Kosovës.

Falenderojmë partnerët ndërkombëtarë, në veçanti ambasadorin amerikan Jeffrey Hovenier, për angazhimin dhe kontributin”, thuhet në komunikatën e Qeverisë së Kosovës. / Gazeta10.