Raporti: Gentiana Gashi/Kanal10

Pavarësisht që propozimi evropian nuk parasheh njohje reciproke, kryeministri i vendit, Albin Kurti ka thënë se vetëm një vendim i tillë, mundëson normalizimin e raporteve me Serbinë. Por, ai ka kritikuar presidentin serb se ka shkelur marrëveshjen për të cilën janë pajtuar të hënën në Bruksel. Ndërkaq, kritik lidhur me përmbajtjen e dokumentit evropian janë shprehur nga opozita, derisa njohës të kushtetutës kanë thënë se propozimi rrezikon funksionimin e shtetit.

Dy ditë pas pajtimit në Bruksel për propozimin evropian, kryeministri i Kosovës, Albin Kurti e ka akuzuar presidentin serb, Aleksandar Vuçiq, se nuk i është përmbajtur një dokumenti të tillë.

Kreu i ekzekutivit kosovar ka thënë se Vuçiqi me deklarimet e tij se do ta kundërshtojë anëtarësimin e Kosovës në Organizatën e Kombeve të Bashkuara, e ka shkelur nenin e katërt të planit për normalizimin e marrëdhënieve mes dy vendeve.

“Presidenti i Serbisë u zotua mbrëmë se do të kundërshtojë anëtarësimin e Kosovës në OKB. Kjo do të përbënte një shkelje të qartë të nenit të 4 të propozimit të BE-së. Normalizimi i marrëdhënieve është i mundur vetëm nëse të dyja palët negociojnë në mirëbesim. Serbia me sa duket ka vendosur të mos e bëjë këtë.”- Albin Kurti – Kryeministër i Kosovës

Ndërkaq, në një deklarim të tij gjatë vizitës në Maqedoninë e Veriut, Kurti ka folur për dialogun e Brukselit.

Ai ka thënë se normalizimi i marrëdhënieve me Serbinë mund të ndodhë vetëm me njohje të ndërsjellë.

E kritika të shumta ndaj kryeministrit Kurti, ka adresuar paraardhësi i tij, Avdullah Hoti.

Sipas deputetit të LDK-së, kreu i ekzekutivit kosovar është pajtuar për një marrëveshje që është në favor vetëm të Serbisë, derisa Kurtin e ka quajtur si mashtrues.

Ndërkaq, profesorit të së Drejtës Kushtetuese, Mazllum Baraliu, ka thënë se propozimi evropian nuk është në përputhje dhe me frymën e Kushtetutës.

Ai ka thënë se disa prej neneve të këtij dokumenti u japin autonomi serbëve, duke krijuar shtet brenda shtetit.

Kosova dhe Serbia janë pajtuar më 27 shkurt në Bruksel për propozimin evropian që si synim ka normalizimin e raporteve ndërmjet të dyja shteteve.

Ky dokument ka 11 nene dhe për disa prej tyre ka pasur reagime të shumta se e dëmtojnë funksionalitetin e shtetit të Kosovës.

Lidhur me zbatimin e këtyre pikave, SHBA-ja dhe BE-ja kanë bërë thirrje që palët të gjejnë pajtim, për çka janë paralajmëruar takime të radhës në mars.