Emisari Special i BE-së në dialogun Kosovë-Serbi Miroslav Lajçak, ka dhënë detaje për takimet që janë mbajtur javën e kaluar në kuadër të dialogut Kosovë-Serbi, duke thënë se qëllimi i këtyre takimeve ishte për të avancuar rrugën drejt zbatimit të Marrëveshjes për normalizim.

 “E mirëpres që të dy liderët treguan gatishmëri për zbatimin e Marrëveshjes, megjithëse nuk arritën të bien dakord për modalitetet”, tha Lajçak.

Ai tha se palët patën pyetje rreth propozimit evropian për statutin për themelimin e Asociacionit të komunave me shumicë serbe.

“Shpresoj se do të jemi në gjendje të sqarojmë pyetjet dhe shqetësimet e hapura në javët në vijim. Statuti ynë propozon një mënyrë moderne evropiane për të trajtuar çështjen e ndjeshme të mbrojtjes së pakicave në përputhje me praktikat dhe standardet më të mira evropiane dhe nuk i kalon kufijtë e kuq të Palëve siç janë përcaktuar më parë”, theksoi ai.

Emisari i BE-së shtoi se shumë shpejt do të ftojë dy kryenegociatorët, atë të Kosovës Besnik Bislimi dhe atë të Serbisë Petar Petkoviq, për një takim në Bruksel.