Deri më 26 dhjetor ka afat për t’u regjistruar si votues jashtë Kosovës, e Komisioni Qendror i Zgjedhjeve (KQZ) ka njoftuar se deri të martën janë bërë mbi 25.100 kërkesa.

KQZ-ja njoftoi se 23.618 janë pranuar, e 1.525 janë refuzuar, duke thënë se në shumicën e të refuzuarve, aplikuesit nuk janë fotografuar duke mbajtur njëkohësisht në dorë dokumentin identifikues.

Sipas KQZ-së, 6.228 shtetas të Kosovës janë regjistruar për të votuar fizikisht në përfaqësi diplomatike, 3.575 për të dërguan pakon me fletëvotim në kutinë postare në Kosovë, e 13.815 jashtë Kosovës.

“Është e rëndësishme ta theksojmë se procesi i regjistrimit të votuesve jashtë Kosovës, nuk është përjashtues. Kjo do të thotë se nëse një shtetas i refuzohet aplikimi, ky nuk është një refuzim përfundimtar, pasi i njëjti ka të drejtë të ri-aplikojë. KQZ i informon individualisht aplikuesit e refuzuar për arsye të refuzimit të kërkesës së tyre dhe gjithashtu aplikuesit e refuzuar njoftohen se mund të ri-aplikojnë për regjistrim dhe të bashkëngjisin dokumentet e nevojshme për të përmbushur kërkesën e tyre në përputhje me udhëzimet e KQZ-së”, thuhet në njoftimin e Komisionit Qendror të Zgjedhjeve.

Ky institucion njoftoi se aplikimi mund të bëhet në platformën elektronike, derisa i ka inkurajuar shtetasit që jetojnë jashtë Kosovës të shfrytëzojnë të drejtën e tyre.

Zgjedhjet parlamentare do të mbahen më 9 shkurt.