Lionel Messi pranoi se ishte “shumë i zemëruar” me veten pasi humbi një penallti në fillim të ndeshjes kundër Austrisë, megjithëse më pas reagoi në mënyrën më të mirë të mundshme duke shënuar dy gola dhe duke vendosur një rekord historik në Kupën e Botës.

Kapiteni argjentinas humbi nga pika e bardhë në minutën e tetë, në një moment të pazakontë për të. Ishte hera e tretë që Messi dështonte të shënonte nga penalltia në historinë e Botërorëve, por zhgënjimi nuk zgjati shumë.

38-vjeçari gjeti rrugën e rrjetës para pushimit dhe më pas vulosi fitoren 2-0 në minutat shtesë të pjesës së dytë. Me këta dy gola, ai arriti në kuotën e 18 golave në Kupat e Botës, duke kaluar rekordin e Miroslav Klose dhe duke u bërë golashënuesi më i mirë në historinë e turneut.

“E godita shumë keq”

Pas ndeshjes, Messi nuk e fshehu mërzinë për penalltinë e humbur.

“Sot pati një moment kur isha shumë i zemëruar për penalltinë e humbur. E godita shumë keq. Për fat të mirë arritëm ta përmbysim atë situatë, të kalojmë në epërsi dhe të marrim tri pikët, që është gjëja më e rëndësishme”, tha ai.

“E dinim se nuk do të ishte e lehtë. Kjo është Kupa e Botës dhe çdo ndeshje është e vështirë. Austria nuk na rrezikoi shumë, por ishte një ndeshje e ngjeshur dhe shumë intensive. E rëndësishme ishte kualifikimi.”

Rekord historik për Messin

Dy golat ndaj Austrisë jo vetëm që i siguruan Argjentinës fitoren dhe kualifikimin, por e vendosën Messin i vetëm në krye të listës së golashënuesve më të mirë në historinë e Botërorit.

Megjithatë, ylli argjentinas preferoi të fliste për suksesin e skuadrës.

“Ne gjithmonë hyjmë në fushë për të fituar. Jemi Argjentina dhe duam të fitojmë ndaj çdo kundërshtari, por e dimë se duhet ta tregojmë këtë në fushë. Sot e bëmë.”

“Jam shumë i lumtur për mënyrën si shkuan gjërat dhe mbi të gjitha për fitoren. Kemi gjashtë pikë dhe kemi arritur një nga objektivat e parë, kualifikimin në fazën tjetër dhe vendin e parë në grup.”

Argjentina mendon për Jordaninë

Skuadra e drejtuar nga Lionel Scaloni do ta mbyllë fazën e grupeve me ndeshjen kundër Jordanisë, ndërsa kualifikimi është siguruar tashmë.

Kjo i jep mundësi stafit teknik të pushojë disa nga lojtarët kryesorë përpara fazës së eliminimit direkt, ku Argjentina synon të mbrojë titullin botëror.

“Do të kemi një javë më të qetë tani që e arritëm objektivin e parë. Tani mendojmë vetëm për atë që vjen më pas. Unë vazhdoj ta shijoj futbollin dhe çdo moment në fushë, si gjithmonë”, përfundoi Messi.