Raporti:Arbenita Ilazi/Kanal10

Gati gjysmë milioni euro arritën të mblidhen falë kontributit të qytetarëve në mbrëmjen e organizuar të enjten, për komunat e prekura nga vërshimet. Megjithatë, nga kjo shumë e mbledhur, asgjë nuk do t’i ndahet Komunës së Mitrovicës, pasi e njëjta nuk bëri publik asnjë numër të xhirrollogarisë. Kryetari i saj, Bedri Hamza tha se janë duke pranuar donacione individuale, dhe se nuk e ka parë të nevojshme që ndihmat e mbledhura të ndahen edhe për ta.

Rreth gjysmë million euro janë grumbulluar për komunat të cilat u përballën me vërshime, në mbrëmjen humanitare e cila u transmetua në televizionin publik dhe në Kanal10.

Për tre orë, telefonata të shumta erdhën nga qytetarë brenda e jashtë vendit, të cilët dhanë kontributin e tyre financiar për familjet e prekura nga përmbytjet.

Mirëpo, këto kontribute nuk shkuan edhe për Mitrovicën, e cila ishte një ndër komunat më të prekura nga vërshimet.

Disa qytetarë u ankuan gjatë emisionit se pse kontributi i tyre financiar, nuk do të mund të shkojë edhe për këtë komunë.

Derisa, moderatori Fatmir Spahiu tha se fajin e ka komuna e cila nuk ka qenë në gjendje të sigurojë një numër të xhirollogarisë.

Mirëpo kryetari i Mitrovicës, Bedri Hamza tha se nuk e ka parë të nevojshme që ndihmat e siguruara në këtë mbrëmje humanitare, të shkojnë edhe për Mitrovicën.

Hamza tha se janë duke pranuar donacione në mënyrë individuale dhe se edhe komuna ka ndarë një shumë për kompensimin e dëmeve.

Për vetëm pakë orë, figura publike, artistë, biznesmenë e qytetarë të shumtë arritën të mbledhin rreth gjysmë milioni euro për familjet që u dëmtuan më së shumti nga përmbytjet e ditëve të fundit.