Emisioni “Kampionët” vazhdon edhe këtë të diel, kësaj radhe duke trajtuar temën rreth kombëtares së Shqipërisë, Ballkanit dhe duke mos lënë anash edhe Superligën e Kosovës.

Të ftuar në studio janë: analisti jonë i përhershëm, Bekim Isufi, të cilit i bashkohen edhe Muhamet Dragusha, Armend Thaqi, Milaim Berisha dhe Granit Tërstena.

Gjatë diskutimit në studio foli edhe Armend Thaqi, lojtar i Ballkanit.

“Ishte ndeshje zhgënjyese, na ka mbetur në kokë, kemi pritur më shumë, ndoshta po të luanim në Prishtinë do të ishtë më ndryshe, pasi atmosfera do të ishte më e mirë” – tha ai.

Tutje, ai përshkroi pak kundërshtarin e ditës së enjte, duke thënë fjalët më të mira për ekipin çek.

“Viktoria Plzen është një skuadër shumë e fortë, ai të ndëshkon më një gjysmë rast, u pa edhe në këtë ndeshje, kaq kemi mundur të bëjmë ndaj tyre” – shtoi ai.

Thaqi konfirmoi për emisionin “Kampionët” se ka pranuar ofertë për t’u larguar nga Ballkani gjatë afatit kalimtar të janarit.

“Po, kam pranuar ofertë për t’u larguar nga Ballkani gjatë janarit, destinacioni i ardhshëm pritet të jetë Turqia, pasi në muajin qershor më dështoi transferimi atje, shpresoj që gjatë muajit të ardhshëm ndodh” – përfundoi ai.