Veriu i Kosovës është ende i bllokuar nga barrikadat e vendosura nga serbët si shenjë revolte kundër arrestimit të ish-policit Dejan Pantiq, që dyshohet për sulmin e zyrave të KQZ-së në veri të vendit.
Por, peng i këtyre barrikadave po bëhen vet serbët pasi që atje nga sot shkollat fillore dhe të mesme nuk janë duke funksionuar, fëmijët janë duke qëndruar në shtëpi.
Ndërkohë Policia e Kosovës ka ndaluar po ashtu kalimin në pikat kufitare Bërnjak dhe Jarinjë për shkak të ofrimit të sigurisë, gjë që ka pamundësuar kalimin edhe në këmbë edhe me veturë në këtë pjesë, raporton Gazeta10.
Për shkak të ngjarjeve në veri edhe Kosova edhe Serbia dje kanë mbajtur mbledhje të Këshillit të Sigurisë.
Pas kësaj mbledhje, Kryeministri i Kosovës Albin Kurti tha se janë duke pritur edhe pak për vendimin e KFOR-it për heqjen e barrikadave në veri të vendit, duke shtuar se Serbia po kërkon të vazhdoj luftën që e humbi dhe kjo përbënë kërcenim për vendin tonë.
Po ashtu Ministri i Punëve të Brendshme të Kosovës, Xhelal Sveçla, kërkoi që barrikadat të largohen.
Ndërkaq pas seancës së Këshillit të Serbisë, presidenti i Serbisë, Vuçiq tha se barrikadat janë shprehje e protestës kundër arrestimit të njerëzve të tyre.
Një ashtu Kryetari i Listës Serbe, Goran Rakiq, ka bërë të ditur dje se është formuar Shtabi i Krizave, i cili do të raportojë rregullisht për gjendjen në terren.
Edhe gjatë mbrëmjes së djeshme rreth 21:00, në Rudar afër Zveçanit janë dëgjuar gjuajtje me zjarr./Gazeta10