Në emisionin “Raport”, me gazetarin Naim Sadiku, kryetari i shoqatës “Konsumatori”, Selatin Kaçaniku, duke komentuar udhëzimin administrativ për qeset e plastikës ka thënë se me vite kanë pritur zgjidhje për qeset e plastikës, raporton Gazeta10.

Ai tutje ka thënë se nuk është mirë që menjëherë të ndalohen qeset por qytetarët të fillojnë të paguajnë si komponentja kryesore socio-ekonomike.

“Ne jemi ata që me qeset e plastikës e ndotim mjedisin dhe duhet të bartim një pjesë të përgjegjësisë por kjo nuk mjafton por ne duhet të kujdesemi për atë se ku po përfundon ajo qese”, ka thënë Kaçaniku.

Ai tutje ka thënë se jo vetëm pagesë por duhet të jetë një stimulim që ne të kontribuojmë në kthimin e qeseve dhe të kryejmë një mision.

Kaçaniku ka thënë se nuk e ka pranuar udhëzimin administrativ dhe nuk ka informata që për këtë udhëzim është konsultuar këshilli për mbrojtjen e konsumatorit.

“Nuk mjafton që ne të paguajmë qeset por ne duhet t’i kthejmë ato dhe qytetarët të marrin pagesën në emër të mbrojtjes së mjedisit”, ka thënë tutje Kaçaniku. /Gazeta10/