Raporti:Arbenita Ilazi/Kanal10

Për më shumë se dy orë po detyrohen që të presin për trajtim mjekësor pacientët në spitalin e ri të pediatrisë. Një qytetar ka treguar se përkundër gjendjes jo të mirë shëndetësore, djalit të tij nuk i’u dha trajtim mjekësor për më shumë se dy orë, nën arsyetimin e mjekja nuk është aty. Ndërsa, nga ky spital kanë thënë se janë duke u përballur me mungesë të stafit dhe se kjo po ua vështirëson punën.

Në gjendje jo të mirë shëndetësore, Arianit Selaci nga Mitrovica e solli djalin e tij për trajtim në spitalin e ri të pediatrisë në QKUK.

Por atyre iu desh që të prisnin më shumë se dy orë për të marrë trajtim.

Selaci ka thënë se përkundër që djali i tij kishte temperaturë të lartë, asnjë nga punëtorët shëndetësorë nuk e kontrolluan.

Sipas tij, atyre i’u kërkua që të prisnin derisa të vinte mjekja përgjegjëse.

Ndërsa, nga ky spital kanë thënë se që nga funksionalizimi i tij, janë duke u përballur me mungesë të punëtorëve shëndetësorë.

Pediatrja Qëndresa Beqiraj ka treguar se momentalisht në repartin e intensivës janë vetëm tri infermiere, andaj edhe po u vështirësohet dhënia e shërbimeve.

Ndërkaq, nga Shërbimi Spitalor Klinik e Universitar i Kosovës kanë thënë se janë duke bërë riorganizimin dhe vlerësimin e secilës nevojë për staf.

“Përmes një grupi punues, ShSKUK është duke bërë riorganizimin dhe vlerësimin e nevojave për secilën klinikë, përfshirë edhe nevojën për infermier/e. Së shpejti pritet të nisin punën 15 infermierë të pranuar së fundmi në QKUK që do të shpërndahen në klinika, po ashtu gjatë vitit 2023 të ketë punësim shtesë të infermierëve”- nga ShSKUK.

Spitali i ri pediatrik-kirurgjik kishte nisur punën më 28 mars të vitit të kaluar.

Ndërsa, në këtë spital edhe më tej vazhdojnë të mos ofrohen shumë shërbime të nevojshme.