Sekretari i Përgjithshëm i NATO-së, Jens Stoltenberg, ka njoftuar se ka biseduar me kryeministrin e Kosovës, Albin Kurti, rreth zhvillimeve të fundit në Kosovë ku ka kërkuar që të gjitha palët ta ruajnë qetësinë, shkruan Gazeta10.

Sekretari i NATO-së ka thënë se palët duhet t’i shmangin veprimet e njëanshme dhe të mbështesin dialogun e ndërmjetësuar nga BE.

Ai ka thënë se do ta vazhdojë komunikimin me Prishtinën dhe Beogradin.

Këtu keni statusin e plotë:

“Bisedova me Albin Kurtin për tensionet e fundit në Kosovë dhe rëndësinë e vazhdueshme të misionit të KFOR-it. Të gjitha palët duhet të ruajnë qetësinë, të shmangin veprimet e njëanshme dhe të mbështesin dialogun e ndërmjetësuar nga BE. Mbetem në kontakt të ngushtë me Prishtinën dhe Beogradin”, ka shkruar Stoltenberg në llogarinë e tij në Twitter.

Kujtojmë se Kosova ditët e fundit është përballur me tensione të mëdha në veri të vendit ku serbët atje kanë bllokuar rrugët në shenjë kundërshtimi ndaj paralajmërimit për vendosjen e masave të reciprocitetit me Serbinë për targat dhe letërnjoftimat.

Tensionet janë ulur pasi Kosova ka pranuar një shtyrje një-mujore të zbatimit të reciprocitetit nën rekomandimet e Shteteve të Bashkuara të Amerikës. / Gazeta10