Sulmet ajrore izraelite kanë vrarë të paktën 12 persona në Gaza gjatë dy ditëve të fundit, thanë të mërkurën zyrtarët lokalë të shëndetësisë, ndërsa bombardimet vazhdojnë pothuajse çdo ditë, pavarësisht armëpushimit me Hamasin që ka hyrë në fuqi prej disa muajsh.

Të mërkurën, tre anëtarë të një familjeje u vranë në Gazën qendrore, njoftuan zyrtarët e Spitalit Al Aqsa, shkruan The Guardian, transmeton Gazeta Express.

Të martën, një grua dhe gjashtë policë ishin mes të vrarëve nga një sulm ajror ndaj një stacioni policor në kampin e refugjatëve Jabalia, në veri të Gazës, një nga zonat më të dendura me popullsi, thanë zyrtarët spitalorë.

Një burrë humbi jetën nga bombardimi i një kampi me tenda në Khan Younis, në jug të Gazës, sipas zyrtarëve të Spitalit Nasser. Ndërkohë, forcat izraelite qëlluan për vdekje një fëmijë në zonën Muwasi, pranë qytetit më jugor të Rafahut, sipas zyrtarëve spitalorë.

Ushtria izraelite nuk komentoi deri tani për sulmet në Gazën qendrore dhe jugore.

Në një deklaratë lidhur me sulmin në Jabalia, ushtria izraelite pretendoi se katër nga policët e vrarë ishin militantë të Hamasit, pa paraqitur prova se si personat e vrarë kishin qenë të përfshirë në planifikimin apo kryerjen e sulmeve.