Leonard Ademaj, ka falënderuar organet e drejtësisë, hetuesit, mediat dhe të gjithë mbështetësit e tjerë në procesin gjyqësor për vrasjen e Liridona Ademajt.

Ademaj me anë të një shkrimi në ‘Facebook’ ka thënë se femicidi në Kosovë duhet të marrë fund me rastin e Liridona Ademajt.

“Kosova duhet të bëhet një vend ku asnjë çikë, asnjë grua nuk duhet të maltretohet, sulmohet apo vritet. Femicidi duhet të marrë fund dhe ne, si familje Ademaj, jemi në dispozicion që t’i bashkohemi çdo kauze dhe iniciative që ndihmon në ndaljen e femicidit”, deklaroi ndër të tjera Ademaj.