Presidenti ukrainas, Volodymr Zelensky,  hodhi poshtë rëndësinë e dërgesës së parë të eksportit të grurit nga vendi i tij që nga pushtimi i Rusisë, duke thënë se ajo mbante një pjesë të të korrave që Kievi duhet të shesë për ta ndihmuar shpëtimin e ekonomisë së tij, shkruan Reuters, transmeton Gazeta10.

Këto komente ai i bëri nëpërmjet një videoje për studentët në Australi të mërkurën, dhe pasi anija e përfundoi një inspektim në Turqi, përpara se të vazhdonte në destinacionin e saj përfundimtar në Liban sipas një marrëveshjeje që synon të lehtësojë një krizë globale ushqimore.

Anija, Razoni, u nis nga porti i Ukrainës Odesa në Detin e Zi, të hënën herët  duke transportuar 26,527 ton misër në Tripoli të Libanit. Ajo erdhi pas një marrëveshjje  të ndërmjetësuar nga OKB-ja për eksportin e drithërave dhe plehrave midis Moskës dhe Kievit muajin e kaluar.

Por Zelensky, duke folur përmes një përkthyesi, tha se duhej më shumë kohë për të parë nëse do të pasonin eksporte të tjera gruri.

“Së fundmi, falë OKB-së në partneritet me Turqinë, patëm një anije të parë me dërgimin e grurit, por ende nuk është asgjë. Shpresojmë që kjo tendencë të vazhdojë,” u tha ai studentëve.

E njohur si shporta e bukës së Evropës, Ukraina shpreson të eksportojë 20 milion ton drithë të mbajtur në kapanone dhe 40 milion ton nga korrja që po zhvillohet tani, fillimisht nga Odesa dhe Pivdennyi dhe Chornomorsk.

“Lufta…pothuajse po e vret ekonominë. Është në koma,” shtoi Zelensky. “Bllokimi i porteve nga Rusia është një humbje e madhe për ekonominë”.

Zelensky ka paralajmëruar vazhdimisht se Moska mund të përpiqet të pengojë eksportet pavarësisht nënshkrimit të marrëveshjes së muajit të kaluar. / Gazeta10