Zyrtarët ukrainas, amerikanë dhe evropianë u takuan në Gjenevë të dielën për të diskutuar një draft plan të paraqitur nga Uashingtoni për t’i dhënë fund luftës në Ukrainë, pasi Kievi dhe aleatët e tij shprehën alarm për ato që i konsideruan si lëshime të mëdha ndaj Rusisë agresore.

Të premten, presidenti i ShBA-së, Donald Trump, tha se presidenti ukrainas Volodymyr Zelensky kishte afat deri të enjten për të miratuar planin me 28 pika, i cili i bën thirrje Ukrainës të lëshojë territor, të pranojë kufizime në ushtrinë e saj dhe të heqë dorë nga ambiciet për t’u bashkuar me NATO-n.

Për shumë ukrainas, përfshirë ushtarët që luftojnë në vijën e frontit, kushte të tilla do të përbënin kapitullim pas gati katër vitesh luftimesh në konfliktin më vdekjeprurës të Evropës që nga Lufta e Dytë Botërore.

Të shtunën, Trump tha se propozimi aktual për t’i dhënë fund luftës nuk është oferta e tij përfundimtare.

Që kur u njoftua plani, ka pasur konfuzion rreth asaj se kush ishte i përfshirë në hartimin e tij. Aleatët evropianë thanë se nuk ishin konsultuar.

Ndërsa zyrtarët filluan të takoheshin pas dyerve të mbyllura në Gjenevë, kancelari gjerman Friedrich Merz tha se qëllimi ishte të hartohej një plan i pranueshëm për Ukrainën, i cili mund të përdoret në një negociatë me Rusinë. Kjo ka të ngjarë të kërkojë kohë, tha ai, shkruan Reuters,