Presidenti i ri i Shqipërisë, Bajram Begaj, ka treguar se u ka bërë ftesë të gjithë krerëve të partive politike në Kosovë për t’u takuar në ndërtesën e Kuvendit të Republikës së Kosovës. 

Begaj ka thënë se dëshira e tij ishte që t’i takonte të gjithë krerët në një tavolinë, por që kjo nuk ishte e mundur, andaj zhvilloi takime të ndara, transmeton Gazeta10. 

“Unë jam president i RSH dhe erdha në Kosovë për të biseduar si vëllai me vëllain, si me familjen time. Këto takime doja t’i mbaja në tempullin politik, që është kuvendi i atij vendi. Ftesa ime ka qenë mjaft e sinqertë për të gjitha partitë politikë, në Kuvendin e Republikës së Kosovës. Sipas përgjigjes së LDK-së dërguar te stafi im, thuhej se presidenti RSH është i mirëpritur në godinën e LDK-së”, tha Begaj në një intervistë për transmetuesin publik. 

Presidenti i Shqipërisë, Bajram Begaj, vizitën e tij të parë zyrtare jashtë shtetit, e zhvilloi në Kosovë. Pas takimit me krerët e institucioneve dhe krerët opozitarë, Begaj nuk arriti të takohej me prijësit e LDK-së, si rezultat i mospajtimeve për lokacionin./Gazeta10