Ardita Sinani, këshilltarja e kryeministrit Albin Kurti për Luginën e Preshevës, ka reaguar pasi që sipas saj për herë të parë në histori të Kuvendit Komunal të Preshevës është mbajtur një seancë e jashtëzakonshme të dielën.

Përmes një postimi në Facebook, ajo ka pretenduar se kjo u bë për zgjatjen e “jetës politike” të kryetarit të Komunës së Preshevës, Shqiprim Arifit, shkruan Gazeta10.

“Është zgjatje e jetës politike, sepse ditëve të fundit, pakënaqësitë me udhëheqjen e pushtetit lokal përveç se nga jashtë taborit politik të shumicës, ato u shpërfaqën edhe brenda tij. Duke sjellur kështu situatën kur një këshilltar nga radhët e APN dhe subjekti politik UDSH të distancohen nga politikat e të parit të Komunës dhe duke u tërhequr nga shumica qeverisëse në pushtetin lokal në Preshevë. Prandaj është zgjatje e jetës politike të një individi. Sepse sot, në ditë vikendi, pa mbulim mediatik, në mënyrë tinëzare një shumicë e brishtë prej 20 këshilltarëve, prej tyre 18 këshilltarë shqiptar dhe 2 këshilltar serb brenda më pak se 5 minutave u bënë pjesë e një turpi që do të mbahet mend gjatë”, shkroi ajo.

Tutje ajo tha se në këtë seancë u kaluan disa pika të rendit të ditës.

“Në ato pak minuta të të ashtuquajturës “seancë”, u kaluan një mori pikash të rendit ditës, pa asnjë diskutim, pa asnjë debat dhe pa asnjë sqarim se pse ky pushtet lokal pati ngërç politik sa të vie puna që në limitet e afatit ligjor të mbajë ‘seancë’”, ka thënë Sinani.

Akuzat e saj kanë vazhduar edhe më tutje, madje ajo ato i lidhi edhe me Listën Serbe.

“Mbase do të dalin në pah edhe marrëveshjet e errëta me Listën serbe, grupacion politik që dihet botërisht që vendimet politike për të qenë apo jo të përfshirë në ndonjë akrobacion të tillë si ky i sotshmi, i merr nga qendra në Beograd. Gjegjësisht nga Aleksandër Vuçiqi”, përfundoi ajo./Gazeta10