Gjatë ditës së sotme janë zhvilluar edhe tri përballjet e radhës në kuadër të 1/16 së finales në Kupën e Kosovës.

Prishtina e Re dhe Suhareka triumfuan si vendas, gjersa Ulpiana pësoi në shtëpinë e saj nga Vjosa e Shtimes.

Skuadra e Elon Berishës, Prishtina e Re mposhti skuadrën e Ligës së Dytë, Beharin me rezultat bindës 7-1.

Edhe Suhareka shënoi fitore të rëndësishme por jo të lehtë ndaj Trepçës së Mitrovicës.

Suharekasit triumfuan në shtëpi me rezultat 2-0, kështu duke siguruar kualifikimin në fazën tjetër të këtij kompeticioni.

Ndërkohë, Ulpiana si vendase nuk arriti të triumfojë ndaj skuadrës tjetër nga Liga e Parë, Vjosës.

Të besuarit e Emin Bajramit pësuan disfatë prej 2-1 nga skuadra e drejtuar nga Leutrim Krasniqi.

Fituesit e këtyre tri përballjeve janë kualifikuar për fazën e ardhshme të eleminimit direkt në Kupën e Kosovës.

Përballja e fundit e kësaj faze luhet nesër mes Dinamo Ferizajt e Vushtrrisë, ndeshje që nis nga ora 12:00.