Qeveria i ka emëruar pesë anëtarë të bordit mbikëqyrës të Ndërmarrjes Publike Qendrore “Trepça”, i cili, siç tha kryeministri Albin Kurti “parashihet t’i ketë në total 9 anëtarë”.

Kurti tha se do të qartësojnë “çështjen e përfaqësimit të punëtorëve në bord” dhe se do të propozojnë “rihapjen e konkursit për pozitat e tjera të lira, duke inkurajuar veçanërisht pjesëtarët e pakicave”.

Kurti propozoi Mentor Berishën për kryesues të bordit, dhe Fadil Bejtën, Merita Gashin, Sadije Gashin e Alban Krasniqin, për anëtarë.

“Të emëruarit i kryejnë detyrat dhe përgjegjësitë në pajtim me legjislacionin në fuqi dhe mandati i tyre zgjatë 4 vite”, tha Kurti pas miratimit të vendimit.