Rreth 8,500 ushtarë koreano-veriorë ndodhen aktualisht në Rusi, ndërsa mes tyre janë edhe rreth 400 operatorë dronësh, sipas inteligjencës ukrainase.

Sipas CNN, Gjeneralmajori Vadym Skibitskiy tha se trupat janë kryesisht në rajonin e Kurskut dhe mund të përdoren për zbulim dhe sulme me dronë ndaj objektivave në Ukrainë.

Sipas tij, Rusia mund të kërkojë deri në 50 mijë trupa të tjerë nga Koreja e Veriut. Ushtarët koreano-veriorë pritet të përforcojnë pozicionet e pasme ruse, duke liruar trupat ruse për operacione në front.

Skibitskiy tha gjithashtu se Pheniani ka furnizuar Rusinë me raketa balistike dhe se në këmbim ka kërkuar sisteme të mbrojtjes ajrore, përfshirë S-400.