Shtetet e Bashkuara kanë vendosur një tarifë prej 50% mbi mallrat kanadeze me vlerë 20 miliardë dollarë (14.6 miliardë paund), ndërsa Kanadaja është zotuar të kundërpërgjigjet ndaj aleatit të saj historik.

Taksa e Donald Trump mbi importet do të prekë rreth 5% të mallrave që Kanadaja eksporton çdo vit në SHBA, nga shkopinjtë e hokejit deri te shkopinjtë e drurit që përdoren për të kontrolluar gjuhën gjatë ekzaminimeve mjekësore, raporton SkyNews.

Kryeministri kanadez Mark Carney tha se vendi i tij do të hakmerret ndaj SHBA-së me masa që do të hyjnë në fuqi më 8 shtator.

Kjo ndodhi pasi të dy vendet nuk arritën të finalizonin një marrëveshje tregtare të premten vonë, pasi negociatat dështuan, duke përkeqësuar një marrëdhënie tashmë të brishtë mes dy partnerëve afatgjatë.

“Kanadaja do t’i përputhë tarifat e reja të Uashingtonit dollar për dollar, për të mbrojtur punëtorët, fermerët, familjet dhe bizneset kanadeze”, tha zoti Carney në një konferencë për shtyp në Otava.

Ai tha se tarifat hakmarrëse do të prekin sektorë si çeliku, produktet e qumështit, pajisjet elektroshtëpiake, makineritë bujqësore, industria e pulpës dhe letrës, si dhe elektronika.

Zoti Carney zbuloi se Kanadaja kishte qenë e gatshme të hiqte tarifat e mbetura hakmarrëse ndaj çelikut, aluminit dhe automobilave, nëse SHBA-ja do t’i ulte ndjeshëm tarifat e veta.

Por ai pretendoi se kërkesat përfundimtare të Uashingtonit shkuan shumë larg, duke thënë: “Kërkuan shumë dhe ofruan shumë pak.”

Ai tha se “ndryshimet e minutës së fundit në kushtet e propozuara nga SHBA-ja ishin të padrejta, joekonomike dhe vunë në pikëpyetje besueshmërinë e çdo marrëveshjeje”.

Sipas kryeministrit kanadez, kushtet e minutës së fundit do të reduktonin lehtësimet tarifore për automjetet e prodhuara në Kanada, do të kufizonin aftësinë e Kanadasë për të lidhur marrëveshje tregtare me vende të tjera dhe do të dobësonin mbrojtjen e gjuhës, kulturës dhe sovranitetit. Ai tha se kërkesa të tilla ishin “të papranueshme”.

Zoti Carney deklaroi: “Ne e kemi kuptuar që në fillim se Amerika ka ndryshuar dhe se nuk do t’i rikthehemi marrëdhënies sonë të vjetër.”

Ai tha se kishte pezulluar negociatat dhe kishte udhëzuar ekipin negociator të Kanadasë të kthehej në Otava.

Kanadaja kishte kërkuar lëshime për tarifat ndaj çelikut, aluminit, automobilave dhe drurit, të cilat SHBA-ja nuk ishte e gatshme t’i ofronte, tha një zyrtar i lartë i administratës Trump për gazetarët.

“Son­te, Kanadaja refuzoi ta finalizojë marrëveshjen tregtare sipas kushteve të dakordësuara në fillim të kësaj jave”, tha përfaqësuesi tregtar i SHBA-së, Jamieson Greer.

“Pavarësisht ofertës së SHBA-së që Kanadaja të merrte trajtimin më të favorshëm nga çdo eksportues i madh në tregun tonë, kërkesat e reja dhe tërheqjet e Kanadasë nga angazhime të tjera kanë prishur ekuilibrin e kujdesshëm të arritur gjatë ditëve të fundit.”

Zoti Greer tha se oferta e SHBA-së ishte “e orientuar drejt së ardhmes” dhe përfshinte një “partneritet historik ekonomik dhe të sigurisë kombëtare”.

Ai kishte thënë më herët se objektivi i Kanadasë gjatë gjithë negociatave kishte qenë të siguronte marrëveshjen më të mirë të mundshme, “asnjëherë një marrëveshje me çdo çmim apo brenda çdo afati”

Nuk janë planifikuar negociata të tjera.

Zoti Carney tha se qeveria e tij do të njoftojë masa shtesë për mbështetjen e punëtorëve dhe bizneseve kanadeze gjatë ditëve në vijim.

Dështimi i negociatave përbën një kontrast të fortë me vetëm dy ditë më parë, kur zyrtarët e të dy vendeve kishin sinjalizuar se po shkonin drejt një kompromisi.

Vendet shkëmbyen mes tyre mallra dhe shërbime me vlerë 880 miliardë dollarë (645 milionë paund) vitin e kaluar, megjithëse ndikimi politik pritet të jetë po aq i rëndësishëm sa edhe pasojat ekonomike.

Historikisht, marrëdhënia mes dy vendeve fqinje ka qenë bashkëpunuese. Kanadaja dërgoi trupa në Afganistan pas sulmeve të 11 shtatorit, ndërsa çdo ditë kufirin kalojnë rreth 330,000 njerëz dhe mallra me vlerë rreth 2 miliardë dollarë (1.47 miliardë paund).

Përshkallëzimi i tensioneve tregtare vë gjithashtu në pikëpyetje të ardhmen e një marrëveshjeje tregtare mes SHBA-së, Kanadasë dhe Meksikës, e cila u arrit gjatë mandatit të parë të Donald Trump.