Të paktën 37 persona janë vrarë dhe dhjetëra të tjerë janë plagosur pasi një sulm me dron nga Rusia ndaj një magazine municionesh shkaktoi një zjarr të madh dhe shpërthime të shumta që zgjatën për orë të tëra në një zonë të banuar pranë Kievit.

Sulmi në distriktin e Buchas ndodhi në një kohë kur Rusia po kryen sulme ajrore pothuajse të pandërprera. Por duket se ishin municionet që ndodheshin në magazinën e goditur ato që patën pasoja katastrofike, raporton CNN.

Presidenti i Ukrainës, Volodymyr Zelensky, u zotua se do të ndëshkohen përgjegjësit që lejuan ruajtjen e materialeve shpërthyese kaq pranë banesave të njerëzve.

Tymur Tkachenko, kreu i administratës ushtarake të rajonit të Kievit, tha se deri të shtunën pasdite dihej se kishin vdekur 37 persona dhe se numri i viktimave mund të rritej më tej. Kjo e bën incidentin një nga më vdekjeprurësit që Kievi ka përjetuar që nga fillimi i luftës, më shumë se katër vjet më parë.

“Ky është një humbje e tmerrshme dhe e pariparueshme. Ngushëllimet tona të sinqerta u shkojnë familjeve dhe të afërmve të atyre që kanë humbur jetën”, tha Tkachenko.

Videot dhe fotografitë e shpërndara nga banorët lokalë tregojnë disa ndërtesa tërësisht të shkatërruara, ku kanë mbetur vetëm disa mure të zhveshura dhe toka e djegur.

Duke folur për sulmin, Zelensky tha se goditja kishte prekur një objekt magazinimi municionesh, për të cilin ai tha se “nuk duhej të ishte aty”.

Ai tha se nga goditja shpërthyen predhat, minat, municione të tjera dhe dronët që ruheshin në objekt.

“Është një situatë e tmerrshme dhe ka pasur neglizhencë të pajustifikueshme nga ata që ruanin materiale shpërthyese pikërisht pranë vendit ku jetonin njerëz”, tha presidenti ukrainas, duke shtuar se për incidentin po zhvillohet një hetim penal.

Ndërkohë, Zyra e Prokurorit të Përgjithshëm të Ukrainës tha në një deklaratë se në objekt ruheshin “objekte dhe materiale shpërthyese” dhe se do të hapej një hetim për “rrethanat që çuan në shpërthimin në ambientet e objektit dhe veprimet e zyrtarëve përgjegjës”.

Incidenti është veçanërisht shqetësues pasi ndodh vetëm disa javë pasi shtatë persona humbën jetën kur një sulm rus goditi një magazinë ku ruheshin sasi të mëdha municionesh në një zonë të banuar në Vyshneve, pranë Kievit, rreth 20 kilometra nga vendi i incidentit të së shtunës.

Zelensky tha se një qendër kujdesi për të moshuarit dhe personat me aftësi të kufizuara ishte ndër dhjetëra ndërtesat e dëmtuara në sulmin e fundit dhe se më shumë se 300 pjesëtarë të shërbimeve emergjente po punonin në vendngjarje.

Autoritetet ukrainase thanë se Taras Didych, drejtuesi për një kohë të gjatë i komunës lokale, ishte ndër viktimat, pasi kishte mbërritur në vendngjarje për të ndihmuar.

“Ai gjithmonë qëndronte pranë njerëzve të tij. Nuk i braktisi as gjatë pushtimit rus – ishte aty, duke ofruar mbështetje dhe ndihmë dhe duke e mbajtur komunitetin të bashkuar gjatë një prej periudhave më të tmerrshme”, tha në një deklaratë Mykola Kalashnyk, ministri ukrainas për Rimëkëmbjen, Infrastrukturën dhe Transportin.

Ditë terrori të pandërprerë

Shpërthimi vdekjeprurës ndodhi në një kohë kur Kievi kishte përjetuar më shumë se dy ditë sulme ruse pothuajse të pandërprera.

Sipas një përllogaritjeje të CNN, nga mesnata e së enjtes deri të shtunën në mesditë, janë dhënë 28 alarme për sulme ajrore, të cilat në total kanë zgjatur më shumë se 28 orë

Një vajzë dyvjeçare, e cila ishte plagosur rëndë në një nga sulmet e shumta të së shtunës, vdiq nga plagët e marra, tha kryetari i Kievit, Vitali Klitschko. Pesë persona të tjerë u plagosën në pjesë të ndryshme të qytetit.

Edhe rajone të tjera u goditën gjatë natës deri të shtunën, me sulme të raportuara në rajonet e Odesës, Dnipros, Zaporizhzhias, Sumit, Khersonit, Kharkivit, Mykolaivit, Donetskut dhe Chernihivit. Sipas Zelenskyt, në sulme u përfshinë më shumë se 260 dronë sulmues, si dhe dronë “Banderol”.

Ndërsa të enjten u regjistruan edhe disa sulme me raketa, shumica e sulmeve gjatë ditëve të fundit janë kryer me dronë me motor reaktiv. Këta janë një shtesë relativisht e re në arsenalin e Rusisë, pasi u vunë re për herë të parë rreth fillimit të këtij viti.

Ata mund të jenë jashtëzakonisht të rrezikshëm.

Dronët me motor reaktiv fluturojnë me shpejtësi deri në 500 kilometra në orë, duke iu shmangur mbrojtjes ajrore të Ukrainës. Ata janë gjithashtu shumë të shpejtë për grupet e lëvizshme ukrainase të zjarrit, ndaj mënyra e vetme për t’i rrëzuar është përdorimi i raketave tokë-ajër ose avionëve luftarakë – të dyja këto mjete janë në sasi jashtëzakonisht të kufizuara në Ukrainë.

“Rusët e kanë rritur ndjeshëm përdorimin e UAV-ve me motorë reaktivë dhe numri i tyre do të vazhdojë të rritet, sepse rusët e kanë kuptuar efektivitetin e tyre”, u tha gazetarëve të shtunën Pavlo Palisa, zëvendësdrejtues i Zyrës Presidenciale të Zelenskyt, duke shtuar se Ukraina duhet të përshtatë mbrojtjen e saj.

“Kjo do të marrë kohë. Dronët interceptues që kemi aktualisht, të cilët në teori mund të kapin dronët me motor reaktiv, ende nuk kanë treguar efektivitetin e pritshëm… po kërkojmë mënyra për ta zgjidhur këtë problem.”