Më 15 dhjetor bëhen 4 vjet qëkur Kosova, aplikoi për të marrë statusin e vendit kandidat për në Bashkim Evropian.Nga ajo ditë, Brukseli kurrë nuk veproi për të ecur para me këtë kërkesë të Kosovës.

Gjatë vizitës së saj në Prishtinë, më 1 tetor, kryetarja e Komisionit Evropian, Ursula von Der Leyen tha se bashkë me Kosovën, duhet të binden 27 vendet anëtare që të procedohet me statusin e vendit kandidat.

Por, Toby Vogel, ekspert për Ballkan në Këshillin për Politikat e Demokratizimit me bazë në Bruksel, thotë se është pikërisht Komisioni ai i cili, sipas tij duhet të dalë me “Propozime Kreative” rreth perspektivës evropiane të Kosovës.

Kjo për vetë faktin që pesë vendet anëtare, Spanja, Greqia, Rumania, Qiproja e Sllovakia nuk e njohin shtetin që shpalli pavarësinë më 17 shkurt 2008.

Megjithatë, sipas tij, në Bashkimin Evropian e as brenda shteteve anetare nuk ka vullnet politik që një gjë e tillë të ndodhë.

Sa i përket dialogut, Vogel ka thënë se emisari special, Peter Sorensen, aktualisht është në fazën e dëgjimit dhe se, sipas tij, nuk pritet të ketë zhvillime në muajt në vijim.

“Pa presion ndaj Beogradit, nuk shoh që gjërat do të lëvizin”, ka thënë Vogel per Klan Kosova.