Ish-komandanti i UÇK-së, Bekim Shyti, ka folur për pritjet e tij lidhur me vendimin për katër ish-krerët e UÇK-së që po gjykohen në Hagë.

Shyti tha se pret që nesër të merret një vendim lirues, duke e cilësuar akuzën si të padrejtë. Ai përmendi edhe pretendimet që, sipas tij, kanë shërbyer si bazë për ngritjen e procesit gjyqësor, duke përfshirë pretendimet për “Shtëpinë e Verdhë” dhe trafikim organesh.

Duke folur për mbështetjen ndaj ish-krerëve të UÇK-së, Shyti tha se qytetarët duhet t’i besojnë drejtësisë dhe materialeve zyrtare.

“Uroj që nesër të gjithë familjarët e kësaj katërsheje të festojmë bashkë në Prishtinë”, u shpreh Shyti.

Ai gjithashtu apeloi që qytetarët të mos bien pre e, siç i quajti ai, “propagandave dhe mekanizmave hibridë”, duke theksuar se pret që dita e nesërme të kalojë pa trazira dhe në atmosferë festive.

“Nesër nuk do të ketë trazira, nesër do të ketë vetëm festë. Shqiptarët nuk kanë pasur në histori betejë më të madhe dhe fitore më të madhe sesa lufta kundër Serbisë”, deklaroi Shyti./Gazeta10