Komisioni parlamentar për Legjislacion po shqyrton procedurën për trajtimin e Ligjit për Dhomat e Specializuara dhe Zyrën e Prokurorit të Specializuar në Hagë, pasi Presidentja Justina Shiroka-Pula e ka kthyer atë në Kuvend për rishqyrtim.

Anëtarja e Komisionit nga radhët e Partisë Demokratike të Kosovës (PDK), Blerta Deliu, tha se mbledhja është thirrur pikërisht për të shqyrtuar vendimin e Presidentes për kthimin e ligjit në Kuvend.

Ajo bëri të ditur se gjatë ditëve të fundit kanë zhvilluar negociata me Lëvizjen Vetëvendosje për mënyrën se si do të procedohet me këtë çështje.

Deliu theksoi se palët janë pajtuar për miratimin e ligjit, por nuk kanë arritur marrëveshje për ndryshimin e përmbajtjes së tij në këtë fazë.

“Ne jemi dakorduar që ta kalojmë ligjin. Megjithatë, dua ta bëj të qartë se nuk kemi arritur dakordësi që të bëhen ndryshime në ligjin”, deklaroi Deliu.

Sipas saj, mospajtimet mes partive kanë të bëjnë me interpretimin e Rregullores së Kuvendit dhe mundësinë e amendamentimit të ligjit në këtë fazë të procedurës.

Ajo tha se PDK-ja ka konsideruar se amendamentimi është i mundur, ndërsa shumica parlamentare ka mbajtur qëndrimin se ndryshimet nuk lejohen në këtë fazë.

Për këtë arsye, Deliu tha se zgjidhja është që ligji të procedohet për miratim në Kuvend në formën aktuale, ndërsa ndryshimet eventuale të trajtohen përmes një procesi të ri.

Deputetja konfirmoi se gjatë ditës së sotme pritet të rivotohet versioni aktual i ligjit.

Ajo theksoi se për miratimin e tij dhe rrëzimin e vetos së Presidentes nevojiten 61 vota në Kuvend.