Për shkak të vërshimeve që rezultuan pas reshjeve të mëdha të shiut dhe dëmeve në fshatra dhe qytete të Kosovës, ka reaguar edhe deputeti i Lidhjes Demokratike të Kosovës, Avdullah Hoti, raporton Gazeta10.

Hoti tha se ndonëse reshjet janë paralajmëruar me kohë nga Instituti Hidrometeorologjik i Kosovës, veprimet e nevojshme nga institucionet përgjegjëse do të duhej të ishin ndërmarrë paraprakisht.

“Reshjet janë paralajmëruar me kohë nga Instituti Hidrometeorologjik i Kosovës dhe, rrjedhimisht, do të duhej të ishin ndërmarrë veprimet e nevojshme nga institucionet përgjegjëse. Të gjithë akterët duhet të jenë në teren në gatishmëri për të vepruar në rast nevoje, si dhe për të riparuar dëmet në infrastrukturë dhe për të ndihmuar menjëherë rastet më në nevojë.”, thuhet në postimin e ish kryeministrit Hoti.

Tutje, Hoti ka ironizuar me Qeverinë duke thënë se Kosova, në “regjimet e kaluara, gjatë 20 viteve të fundit”, e ka ndërtuar sistemin për reagim në situata të tilla./Gazeta10